"Habang sinusolusyunan natin ang kakulangan sa silid-aralan, kailangan din nating tutukan ang digital gap. Bibigyan natin ang mga estudyante ng kompyuter, smart TV, digital books, at maaasahang koneksyon sa internet," pahayag ni Pangulong Bongbong Marcos.
Mas napaaga ang pagbili ng mga ICT resources dahil sa prayoridad na ito ni Education Secretary Sonny Angara sa unang anim na buwan niya sa posisyon. Ayon sa DepEd noong Pebrero 4, 2025, matagumpay ang Early Procurement Activities (EPA) para sa 23,614 smart TV packages, 33,539 laptop para sa mga guro, at 5,328 laptop para sa non-teaching staff. Pinakamalaki ang alokasyon sa Region IV-A (CALABARZON), Region VI (Western Visayas), at Region VIII (Eastern Visayas).
Bagama’t naapektuhan ng P10 bilyong budget cut ang orihinal na target na 800,000 laptop at smart TV, patuloy ang rollout sa tulong ng Department of Finance at fiscal management team ng pangulo upang maibalik ang pondo para sa digital programs.
Ayon kay Sec. Angara, "Ipagpapatuloy natin ang mga computerization program ngayong taon. Layunin nating mabigyan ang bawat paaralan ng 'e-cart' o roving computer lab. Kasabay nito, maglalaan tayo ng iba’t ibang software tools upang suportahan ang mga guro."
Bukod sa pagsasaayos ng teacher-to-laptop ratio, layunin ng programang ito na tulungan ang mga guro at estudyante, lalo na sa mga lugar na nangangailangan ng alternative learning setups dahil sa mga kalamidad. Magagamit din ng mga estudyante ang mga laptop para masanay sa online assessments, mapaunlad ang kanilang teknikal na kaalaman, at hasain ang kakayahan sa problem-solving.
0 Comments