Hinatulan ng 11 taong pagkakakulong ang isang punong-guro ng pampublikong paaralan sa Virac, Catanduanes dahil sa umano’y pamemeke ng pampublikong dokumento at pagbulsa ng P5,000 mula sa pondo ng gobyerno.
Sa desisyong inilabas noong Pebrero 12, pinagtibay ng Sandiganbayan ang hatol ng Virac Regional Trial Court (RTC) Branch 42 laban kay Anchelita Sicio, punong-guro ng Taytay Elementary School. Siya ay napatunayang nagkasala ng malversation at falsification ayon sa Revised Penal Code (RPC).
Para sa kasong malversation, kinatigan ng Seventh Division ng anti-graft court ang sentensiyang ipinataw ng RTC: apat na buwan at isang araw hanggang tatlong taon, anim na buwan, at 21 araw na pagkakakulong. Bukod dito, pinanatili rin ang kanyang diskwalipikasyon mula sa paghawak ng anumang posisyon sa gobyerno at pinagmulta siya ng P5,000.
Dagdag pa rito, ipinataw ng Sandiganbayan ang karagdagang multang P5,000 bilang civil liability, na katumbas ng halagang umano’y ibinulsa ni Sicio mula sa pampublikong pondo.
Samantala, para sa kasong falsification, binago ng Seventh Division ang orihinal na desisyon ng RTC. Una nang hinatulan si Sicio batay sa panuntunang ang kasalanan ay ginawa ng isang pribadong indibidwal, ngunit iginiit ng anti-graft court na siya ay dapat hatulan bilang isang opisyal ng gobyerno, na may mas mabigat na parusa.
Dahil dito, binago ng korte ang kanyang sentensya mula sa orihinal na apat na buwan at isang araw hanggang tatlong taon, anim na buwan, at 21 araw, patungong anim na buwan at isang araw hanggang walong taon at isang araw na pagkakakulong. Bukod dito, pinagmulta rin siya ng P3,000.
Ayon sa rekord ng korte, pinalsipika umano ni Sicio ang isang sales invoice upang palabasing bumili ang paaralan ng 28 bag ng semento na nagkakahalaga ng P7,000. Gayunman, lumabas sa imbestigasyon na walong bag lamang ang totoong binili, na nagkakahalaga ng P2,000.
Napag-alaman ng Seventh Division na nabigo si Sicio na ipaliwanag kung nasaan ang nawawalang P5,000, na bahagi ng financial assistance na ipinagkaloob sa kanilang paaralan ng pamahalaang panlalawigan ng Catanduanes.
0 Comments